பறக்கை மதுசூதனப் பெருமாள் திருக்கோவிலில் நடைபெறும் விசேஷ வைபவங்களில் அழகிய வெள்ளிக் கருட வாகனத்தில் பெருமாள் பவனி வர மத்வாச்சாரியார் வழி வந்த போற்றி இனத்தவர்கள் சுமப்பது நீண்ட கால மரபு !
கர்நாடக மாநிலம் உடுப்பியை பூர்வீகமாகக் கொண்ட துளு மொழி (மராத்தி மொழியிலிருந்து பிறந்த கொங்கணி, மலையாளம், கன்னடம் கலந்த மொழி) பேசும் போற்றி இனத்தவர்கள் காலப் போக்கில் அரிதாகி விட்ட காரணத்தால் கடந்த முப்பது வருடங்களுக்கு மேலாக பிராமணர்கள் இத்திருப்பணியைத் தொடர்ந்து வருகிறார்கள் !
ஆடி சுவாதி, புரட்டாசி சனிக் கிழமை, வைகுண்ட ஏகாதசி ஆகிய வைபவங்களில் கோவிலுக்குள் திருவுலா வருகின்ற பெருமாள் பங்குனித் திருவிழாவின், ஒன்பது மற்றும் பத்தாம் நாளில் பள்ளி வேட்டை, ஆறாட்டு வைபவங்களில் வெள்ளிக் கருட வாகனத்தில் திருக்கோவிலை விட்டு வெளியே பவனி வருவார் !
பங்குனித் திருவிழாவிற்கு முன்னரே பத்மனாப அய்யரும் மாணிப் போற்றியும் தனது பரிவாரங்களுடன் திருப்பணிகளைத் துவங்கி விடுவர். வெள்ளிக் கருட வாகனத்தை எலுமிச்சை உபயோகித்து சுத்தம் செய்தல், திருவிளக்குகளைத் துலக்குதல், பாத்திரங்களை சுத்தம் செய்தல் ஆகிய பணிகளுக்கு அப்பாவையும் உடனழைத்துச் செல்வது வழக்கம். அந்தணர்களால் மட்டுமே சுமக்கப் படுகின்ற கருட வாகனத்தை அப்பாவும் இணைந்து சுத்தம் செய்வதை மகாபாவமாக நினைப்பவர் அம்மா !
"தனக்கு சேவை செய்பவர் பக்தனா என்று மட்டுமே பார்க்கின்ற பரமன், பார்ப்பனராவென ஒரு போதும் பார்ப்பதில்லை " என பரந்த உள்ளம் கொண்ட பத்பனாப அய்யர் வாதாடினாலும் பழைய சம்பிரதாயங்களில் ஊறிப் போன அம்மாவின் மனம் அக்கருத்தை ஒரு போதும் ஏற்றுக் கொள்வதில்லை !
பேருந்து நடத்துனரான அப்பாவுக்கு பயணிகளால் தவறவிட்ட பணப்பைகளும் விலை உயர்ந்த பொருட்களும் பலமுறை பேருந்துகளிலிருந்து கிடைத்ததுண்டு. அதனைப் பத்திரமாக துறை நிர்வாகத்திடம் ஒப்படைத்து விடுவார் !
நாகர்கோவில் திருவனந்தபுரம் வழித்தடத்தில் நடத்துனராக பணியாற்றிய 1979 காலகட்டத்தில் கிறிஸ்துமசுக்கு முந்தைய தினம் பேரூந்தில் அப்பாவுக்கு கிடைத்த மூவாயிரம் ரூபாய்க்கு மேலடங்கிய பணப்பையை நிர்வாகத்திடம் ஒப்படைத்த போது அப்பாவின் பொருளாதார நிலை குறித்து நன்கறிந்த கண்டிப்புக்கு பெயர்போனவரும் அப்பா மீது நன்மதிப்பு கொண்டவருமான அந்த உயர் அதிகாரி பணப்பையை எடுத்துச் செல்ல பரிவுடன் வற்புறுத்திய போது "தனக்கு அருகதையில்லா எப்பொருளும் வேண்டாமென'த் திட்டவட்டமாக மறுத்துவிட்டார் அப்பா !
நானும் அக்காவும் கல்லூரியில் படித்துக் கொண்டிருந்த காலகட்டத்தில் கல்விக் கட்டணத்தை உரிய சமயத்தில் செலுத்துவதற்கு அப்பாவின் அதிக உழைப்பு தேவைப்பட்ட சிக்கலான நேரம் அது !
"இறைவன் நல்வழி காட்டுவார்" எனச் சொல்லி வந்துவிட்ட நேர்மையான அப்பாவை இறைவன் ஒருபோதும் கைவிட்டதில்லை. முந்தைய இரவு சரிவரத் தூங்காமல் கண்விழித்துப் பணியாற்றி பிற்பகல் வீட்டிற்கு வருகின்ற அப்பா ஒரு மணி நேரம் ஒய்வெடுக்க நினைக்கும் வேளையில் திருப்பணிகள் தொடர்பாக அழைக்கின்ற நண்பர்களுடன் சென்று விடுவார் !
திடகாத்திரமான உடம்பும் வைராக்கியமும் ஆளுமையும் இறையருளால் ஒருங்கே பெற்றிருந்தார் அப்பா. வருமானமில்லா திருக் கோவில்களுக்கு வழங்கப் படுகின்ற குறைந்த அரசு நிதியில் திருவிழாக்களை நடத்துவது ஸ்ரீகாரியத்திற்கு ( கோவில் நிர்வாகி) சவாலான விசயம் !
திருவிழா முடிந்து மாதங்கள் பல கடந்த பின்னரே சமர்ப்பித்த செலவினப் பட்டியல்களுக்கான நிதி கிடைக்கும் வாய்ப்புள்ள காரணத்தால் தேவையான நிதியை மனைவியின் நகைகளை அடகு வைத்தாவது திருவிழாவிற்கு முன்னரே ஸ்ரீகாரியம் திரட்ட வேண்டும் !
ஊரிலுள்ள பக்தர்களின் பங்களிப்புடன் அமைக்கப் படுகின்ற உற்சவக் கமிட்டியில் முக்கிய பொறுப்பாளர்களில் ராசா அண்ணாச்சியும் அப்பாவும் நிச்சயமாக இடம் பெறுவார்கள். இறைவனுக்காக வசூலிக்கப் படுகின்ற ஒரு காசைக் கூட சொந்த செலவுகளுக்காக பயன்படுத்தக் கூடாதென்ற உறுதியான கொள்கை காரணமாக காலையில் வீட்டில் பழைய சாதம் சாப்பிட்ட பின்னரே திருவிழா நிதி வசூலுக்கு இவர்கள் கிளம்புவார்கள் !
-------------------------------------------------------------------------------------------
ஆக்கம் + இடுகை
[sethumathavan2021@gmail.com]
கூடுதல் ஆட்சியர்
I.T.I. முகநூற் குழுமம்
{26-12-2020}
-------------------------------------------------------------------------------------------
